Le blog de Sangha OP

ការណ៏ដែលក្រុម សម រង្សី ប្រើការពាក្យស្លោកថា « សម រង្សី និង កឹម សុខា ជាមនុស្សតែមួយ » ជាការចាំបាច់សំរាប់បង្ហាញ នូវការបន្តសកម្មភាព នៃគណបក្ស លើឆាក ជាតិ និង អន្តរជាតិ នៅពេលដែលប្រធានពេញច្បាប់ គ្មានលទ្ធភាព ធ្វើសកម្មភាពនយោបាយ។ ប៉ុន្តែ ចំពោះក្រុម កឹម សុខា, ប្រយោគនេះ វាមិនអាចទទួលយកបានដោយមានអំណរ ព្រោះវាអាចមាន គ្រោះថ្នាក់ដល់ កឹម សុខា ទៅវិញ។ បើសិនជាទំនាស់រវាងក្រុមទាំងពីរ វាឋិតនៅលើចំណុច ដែលបានរៀបរាប់ ជាសម្មតិកម្មខាងលើនេះ គឺវាជាគំនិតកញ្ជោត និង ជាបរាជ័យបន្តទៀតនៅចំពោះមុខអំណាចផ្តាច់ការជំនាញជាញជ័យ។ សួរថា តើបុគ្គល សម រង្សី ជាចម្លើយទៅនឹងការចាំបាច់ នៃស្ថានការណ៏ដែរឬទេ ?

សំនួរនេះ សមនឹងលើកយកមកពិចារណា ក្នុងគំនិត រកការពិត អំពីវត្តមាន ជាប្រយោជន៏ របស់លោក កឹម សុខា នៅក្នុងការតស៊ូដើម្បីតម្រង់វិញ នូវលទ្ធិប្រជាធិបតេយ្យ។ ជារាងកាយ សព្វថ្ងៃនេះ លោក កឹម សុខា ជាអ្នកទោសមនសិការ ជាប់ឃុំឃាំងនៅក្នុងភូមិគ្រឹះរបស់គាត់។ ស្ថានភាពនេះ ជាជម្រើសផ្ទាល់របស់គាត់។ មូលហេតុ គឺសុខភាព, ពោលថា ជម្ងឺរបស់គាត់ ត្រូវចាំបាច់មានការពិនិត្រវេជ្ជសាស្ត្រទៀងទាត់, ដែលនាំអោយគាត់ សំរេចចិត្តយល់ព្រម ទទួលយកលក្ខខណ្ឌតឹងរ៉ឹងមួយចំនួន របស់អាជ្ញាធរពាក់ព័ន្ធ ដើម្បីផ្ទេរទីកន្លែងឃុំឃាំង។

យើងដឹងថា សហរដ្ឋអាមេរិក ជាមហាអំណាចតែមួយគត់ ដែលមានលទ្ធភាព អាចធ្វើអន្តរាគមន៏យោធា លើពិភពលោក ដោយឥតចាំបាច់ពឹងពាក់ប្រទេសណាមួយឡើយ។ អនុភាព នៃសហរដ្ឋអាមេរិក មិនត្រឹមមានតែ ក្នុងវិស័យយោធា តែវាមានស្ទើរតែគ្រប់វិស័យ ដែលគេ តែងសម្គាល់ នូវអនុភាពនោះ ក្នុងរូបភាពបីយ៉ាងគឺ : អេប៉ូល (Apple), ហូលីវូត (Hollywood), និង ហាវារដ៏(Harvard)។ រួមសេចក្តីមកគឺ : បច្ចេកទេសជាន់ខ្ពស់ ផ្នែកការឲដំណឹងរហ័ស, វប្បធម៍ប្រជាករ និង ឧត្តមការសិក្សា។ រូបភាពទាំងបីនេះ បានជ្រាបចូលទៅក្នុង គំនិតប្រជាពលរដ្ឋនៅលើពិភពលោក ហើយគេតែងទុកវា ជាយោង សំរាប់សម្គាល់ នូវ ភាពទំនើប និង ជឿនលឿន របស់សង្គមនីមួយៗ ក្នុងសាកលលោកនេះ។ តើឥទ្ធិពលនេះ កើតមកពី សហរដ្ឋអាមេរិក ធ្វើនយោបាយចក្រពត្រនោះឬ ?

ក្រោយពីការរលំ នៃរបងទីក្រុង ប៊ែកឡាំង នៅឆ្នាំ ១៩៨៩, គេឃើញថា កម្លាំងនៃលទ្ធិប្រជាធិបតេយ្យ មានការរីកចំរើនរហ័ស នៅក្នុងបណ្តាលប្រទេសខាងកើត នៃទ្វីបអឺរ៉ុប។ វាគឺជាទីបញ្ចប់ នៃប្រវត្តិសាស្ត្រ ដែលលោក Francis Fukuyama បានសរសេរ អំពីជ័យជំនះ នៃលោកសេរី លើលោកកុម្មុយនិស្ត។ តែបន្ទាប់ក្រោយមក វាមានកើត នូវគំនិតជាតិនិយមជ្រុលនៅលើពីភពលោក និង ចលនាសាសនានិយម នៅក្នុងបណ្តាលប្រទេសអ៊ីស្លាម ដែលនាំអោយពិភពលោក ធ្លាក់ទៅក្នុងអសន្តិសុខមិនទៀង សូម្បីតែ សហរដ្ឋអាមេរិច ដែលជាមហានគរប្រជាធិបតេយ្យ ក៏ជួបប្រទះ នូវបាតុភូតនេះដែរ។

នយោបាយ ត្រូវស្គាល់បរិធាន សំរាប់ប្រើ, ដូច្នេះ ការចរចា ជាការទូត ដែលតម្រូវ អោយនយជន យកមកប្រើ ជាបរិធាន។ តែ ការចរចា ក៏មិនត្រូវភ្លេចគោលដៅដើម នៃនយោបាយ, ដូចយ៉ាង នៅពេលសង្គ្រាម គឺ នឹកភ្នក ដល់សន្តិភាព បើទោះបីនៅលើសមរភូមិ មានការប្រយុទ្ធដ៏កាចសាហាវ។ នៅក្នុងស្រុកខ្មែរ គ្មានសង្គ្រាម ក៏មិនត្រូវភ្លេចល្បិចកលខូចយកឈ្នះ របស់ភាគីប្រឆាំង បើទោះបី មានលទ្ធិប្រជាធិបតេយ្យជាគ្រឿងលំអរបប។